टेलिकमको प्रति शेयर आम्दानी १४ वर्षयताकै न्यून, तीन वर्षमै ५७.३७ प्रतिशत गिरावट
काठमाडौं । सरकारी स्वामित्वको दूरसञ्चार कम्पनी नेपाल टेलिकमको प्रति शेयर आम्दानी १४ वर्षयताकै न्यून देखिएको छ । ११६.५६ रुपैयाँ रहेको टेलिकमको प्रति शेयर आम्दानी बिदा हुने तरखरमा रहेका वर्तमान प्रबन्ध निर्देशक डिल्लिराम अधिकारीको कार्यकालमा ५७.३७ प्रतिशतले घटेर ४९.६९ प्रतिशतमा झरेको हो ।
नेपाल दूरसञ्चार कम्पनी लिमिटेड (नेपाल टेलिकम) मा अधिकारी प्रबन्ध निर्देशक नियुक्त हुनु अघि अर्थात् २०७४/०७५ मा कम्पनीको प्रति शेयर आम्दानी इतिहासकै उच्च विन्दुमा रहेको थियो । तर उनको तीन वर्षे कार्यकाल सुरु भएसँगै त्यस्तो आम्दानीमा लगातार गिरावट देखिएको हो ।
नेपाल टेलिकमको वित्तीय प्रतिवेदन अनुसार अधिकारीको कार्यकालको पहिलो वर्ष (२०७५/०७६) मा ६५.०५ रुपैयाँमा झरेको प्रति शेयर आम्दानी दोस्रो वर्ष (२०७६/०७७) मा ६४.९९ रुपैयाँ र तेस्रो वर्ष (२०७७/०७८) मा ४९.६९ रुपैयाँमा खुम्चिएको छ । कम्पनीको आम्दानी र नाफा दुवैमा गिरावट आउँदै गएपछि त्यसको असर कम्पनीको प्रति शेयर आम्दानीमा समेत परेको हो ।
| प्रबन्ध निर्देशक | अनुपरञ्जन भट्टराई | बुद्धि आचार्य | कामिनीराज भण्डारी | डिल्लिराम अधिकारी | |||||
| आर्थिक वर्ष | २०६९/०७० | २०७०/०७१ | २०७१/०७२ | २०७२/०७३ | २०७३/०७४ | २०७४/०७५ | २०७५/०७६ | २०७६/०७७ | २०७७/०७८ |
| आम्दानी रू. अर्बमा | ३८.८६ | ३९.५२ | ४२.६४ | ४४.२१ | ४४.५९ | ४५.२७ | ४३.४८ | ४२.९९ | ४१.६४ |
| खुद नाफा रू. अर्बमा | ११.३० | ११.५५ | १४.५६ | १३.६८ | १५.३७ | १७.४८४ | १०.२०८ | ९.७४९ | ७.४५४ |
| प्रति शेयर आम्दानी | ७५.३३ | ७७.१२ | ९७.०४ | ९०.३६ | १०२.४९ | ११६.५६ | ६५.०५ | ६४.९९ | ४९.६९ |
कम्पनीमा नेपाल सरकारको ९१.५० प्रतिशत, सर्वसाधारणको ८.४७ प्रतिशत र नागरिक लगानी कोषको ०.०३ प्रतिशत शेयर स्वामित्व रहेको छ । वर्तमान प्रबन्ध निर्देशक डिल्लिराम अधिकारी आफ्नो तीन वर्षे कार्यकाल पूरा गर्दै यही पुस २२ गते बाहिरिँदैछन् ।
रिक्त रहने टेलिकम प्रमुख नियुक्तिका लागि सञ्चार तथा सूचना प्रविधि मन्त्रालयले आवश्यक प्रक्रिया अगाडि बढाइसकेको छ । जसका लागि नौ जना उम्मेदवार प्रतिस्पर्धामा छन् । चार वर्षे नयाँ कार्यकालका लागि कम्पनीको बिग्रिँदो वर्तमान आर्थिक परिसूचक र बजार सुधार गर्नुपर्ने चुनौती सामना गर्न त्यति सहज हुनेछैन ।
The post टेलिकमको प्रति शेयर आम्दानी १४ वर्षयताकै न्यून, तीन वर्षमै ५७.३७ प्रतिशत गिरावट appeared first on Tech News Nepal.
from Tech News Nepal https://ift.tt/3JqPo89
via
Comments
Post a Comment